肥妹：大家好！爸爸呢排好忙，不過忙極，爸爸都會盡量安排帶我哋去玩，星期日我哋又出海咯！

肥妹：爸爸，我又要鍚鍚，唔好剩係鍚泊泊！

深仔：妹妹，不如我哋一陣又走路咯？

肥妹：咁我負責睇住爸爸，引開爸爸等你哋哩埋吖！

肥妹：今次大家都好準時，未到十一點就到左西貢，一齊行去碼頭；爸爸個學生Money太可惡喇！蝦佢媽媽，一路死拖住向前跑，爸爸睇唔過眼，交換拖我哋，Money即刻知死，沿途乖到好似另一隻狗狗咁！

肥妹：係船上面，班大人玩到無嘢玩，又搵我笨！哼！三十幾人三十幾狗，係都要攪我，爸爸仲要係笑得最大聲，離哂譜！介紹下一齊玩嘅狗狗先：

佢係我哋童黨最新成員，收養前只知佢大約四歲，就改左名叫四歲，後來家長嘅家長話唔吉利，驚佢過唔到四歲（其實已經四歲九個月大），就用同音字，叫四帥！爸爸就梗玩嘢啦！話港產漫畫＜龍虎門＞有一個亦正亦邪嘅角色叫四龍元帥，暱稱咪叫四帥，再簡單啲，直頭叫人哋阿四！（佢又應嗰下吹脹！）

佢叫Soho，一隻百幾磅嘅小朋友聖班納！

佢叫Pulto，仲細，啱啱至夠半歲，不過已經重過我，咁我又點算肥喎？

佢係Pulto嘅家姐，叫Ziki，爸爸叫佢水怪，因為佢勁鍾意玩水兜嘅水！

佢咪就係家家囉！越來越嗲人，家陣仲學識鍚人，爸爸冧到唔識俾反應！

用紅色General Leader嘅係家家細妹，叫寶寶，上次見係五月嘅事，嗰時佢同我差不多大小，家陣？拍得住四帥個細佬肥B咯！（後面笑緊嗰隻金毛）

有得玩，點會少左契哥O仔

同契妹金金

今次餅餅都有黎，仲好奮勇咁跳落海游游游，驚死佢爸媽同我爸爸丟底唔理佢咁，正傻佬！

佢細佬Tago，第一次出海！小白同契妹咖喱都有黎玩！

有家家寶寶姊妹花，又點會少得阿波伯？佢好好笑囉！佢哥哥抱佢行上甲板時，佢突然嘔，仲要係一嘢嘔落Jack媽個身度，爸爸衰到顧住笑，無幫手清潔！

我諗無咩人會識佢，佢第二次同我哋出黎玩，佢係白爹利叫維他奶，係舊年十二月，爸爸同班義工叔叔姐姐係流浮山唯一rehome到嘅狗狗，佢對耳係狗場無人理，攪到發炎破壞左軟骨組織（嗰時佢對耳好似有隻雞蛋係裡面嫁！），唔似我哋咁會樹起，不過佢媽媽話仲好，肯定唔會認錯佢！

呢隻懶小狗依人嘅就係同我哋三個合稱銀城四惡嘅首惡－－惡Bu；佢妹妹白白啲皮膚病又發作，同某一個好重要嘅私人原因（爸爸被要脅唔講得住，否則會殺人滅口，我唔要做孤兒女，所以我知都唔講，有人知都唔俾講！），今次無出黎玩！

佢係小牧得得同佢哥哥－爸爸新收嘅弟子Jason哥哥；Jason哥哥係暑假跟爸爸學點樣幫我哋沖涼，依家好多時去完玩，都係Jason哥哥幫我哋沖涼，爸爸同其他人就負責吹毛！

呢兩隻拉布拉多，黑色嘅叫Jack，爸爸叫佢黑鬼（又係咁都應，吹脹！），佢好好笑嫁，唔可以好斯文咁叫佢Come，一定要好惡咁叫佢，佢至會極速衝埋黎；啡色嘅叫Bosco，佢兩個成日玩到癲，仲識互相咬住對方條拖繩去放對方！

佢兩個玩到無時停嫁，爸爸控制到黑鬼，但係Bosco又會再撩玩，煩爆！黑鬼好跟爸爸嫁，仲癲到爸爸係船頂玩跳海，個傻佬唔理自己上左Choke Chain仲綁緊左係欄杆，以為爸爸遇溺，慘叫幾聲就飛身跳落海；好彩衝力夠大，條鍊扯斷左，如果唔係，佢一定係船邊半天吊，再唔係就頸骨都拉斷！

呢個係Bosco嘅爸爸同佢家姐，佢家姐CoCo係我哋童黨裡面嘅元老級狗狗，因為佢成十二三歲嫁喇！

終於唔使我玩騎膊狗，今次有Bobby幫我頂，Angel都游得舒服啲，仲可以唔使扶Bobby，佢都唔跌，勁！

爸爸話要影返張白爹利同舟共濟，七隻白爹利一齊係船影張相！

泊泊（右）：妹妹，爸爸呢？

肥妹：爸爸話差不多要撤退，佢去搵深仔喎！

深仔：爸爸，爸爸，你放過我啦！

後記：是次船河笑料極多，又極幸運；回程旅遊車過紅隧時才開始打風落雨，好幸運哦！

另外，是次活動三十九人報名，三十七人付費（兩位工作人員－惡爸及Josephine免費，另其中兩人多於一星期前退團而人數亦足夠，故可安排退款，即實計三十五人），出席三十三人，收費減去船租及飲品食物後，餘數港幣三百一十元，全數撥入義工隊基金（夠買兩包糧，Better than nothing!）！

收入：活動費用：HK$200 x 35 = HK$7,000

　　　車　　費：HK$60 x 18 = HK$1,080

總收入：HK$8,080

支出：船租 HK$5,000

　　　冰HK$50

　　　食物 HK$1,170

　　　飲品 HK$350

　　　車費 HK$1,200

總支出：HK$7,770

盈餘：HK$310